APE Galicia reúne en Mondoñedo administración, persoal técnico e emprendedoras nunha xornada que puxo sobre a mesa dúas necesidades do territorio: facilitar a continuidade dos negocios que afrontan a xubilación e crear condicións para que medren novos proxectos empresariais.
Mondoñedo converteuse nun punto de encontro para falar de emprendemento, pero tamén para poñer enriba da mesa algo máis concreto: como conseguir que os negocios que xa existen teñan continuidade e que novos proxectos atopen motivos para quedar, medrar e xerar emprego no territorio.
Esa foi unha das ideas que deixou a xornada organizada por APE Galicia, na que participaron representantes institucionais, persoal técnico e emprendedoras que están desenvolvendo os seus proxectos na zona.
Tras a benvida do alcalde de Mondoñedo, a Secretaría Xeral de Emprego e Relacións Laborais presentou o Campus Formativo do Emprego Autónomo, achegando aos asistentes unha ferramenta pensada para reforzar a formación e o acompañamento das persoas traballadoras autónomas.
A parte máis práctica chegou da man de Belén Liste, que abordou como prepararse para solicitar as axudas de 2027 e trasladou diferentes recomendacións para anticipar documentación, coñecer os requisitos e afrontar as futuras convocatorias con maior planificación.
O territorio fala: pequeno negocio, remuda e emprego
A conversa sobre o traballo desenvolvido polo Polo de Emprendemento de Mondoñedo permitiu baixar das políticas xerais á realidade concreta do territorio.
A directora xeral de Traballo Autónomo e Economía Social, Marta Mariño, explicou como se desenvolve a política de emprendemento desde unha estrutura próxima ás persoas e aos concellos, como o Polo de Mondoñedo, que dá cobertura a 18 municipios, desde A Mariña ata A Terra Chá.
Pola súa banda, o técnico do Polo Francisco Lago puxo o foco nunha realidade que atopan sobre o terreo: a presenza de numerosos pequenos negocios e, ao mesmo tempo, de persoas que se aproximan á xubilación sen ter sempre asegurada a continuidade da súa actividade.
Neste escenario, destacou o papel do Polo como unha auténtica antena no territorio, capaz de detectar negocios que buscan relevo e poñelos en contacto con persoas interesadas en emprender para facilitar procesos de Remuda.
Pero a conversa tamén deixou outro reto enriba da mesa: atraer á zona proxectos de maior dimensión que poidan crear emprego e actividade económica.
Sonia e Pilar: emprender para quedar e para medrar
A teoría deu paso despois ás experiencias reais.
Sonia Fuentes Sión e Pilar Orol compartiron os seus percorridos profesionais, as decisións que tiveron que tomar e os retos que atoparon para facer avanzar os seus respectivos proxectos.
Dúas historias diferentes, pero cunha coincidencia especialmente significativa: ningunha das dúas pensa en quedar onde está. As dúas queren seguir medrando.
E ese desexo deixou tamén un pequeno compromiso para o futuro: volver a Mondoñedo e comprobar como evolucionaron os seus negocios.
O presidente de APE Galicia, José Ramón Caldas, participou nun encontro que concluíu co peche institucional da secretaria xeral de Emprego e Relacións Laborais, Susana Pérez.
A xornada deixou así unha fotografía bastante clara do emprendemento no territorio: hai pequenos negocios que necesitan continuidade, persoas dispostas a poñer en marcha novas iniciativas e proxectos que queren crecer. O reto está en conseguir que esas tres pezas se atopen e teñan ferramentas para avanzar.